قصيدة... ويمر العمر بينا
- Rafik Sabet
- Aug 31, 2020
- 4 min read
Updated: Sep 1, 2020
بقلم : رفيق عادل
---------------------------
بيمر العمر بينا ، و يسيب آثاره فينا
ونفضل طوله نحارب و لا يوم نقدر عليه
و تمر بينا سنين ، واحده واحده آه
و فجأة تجمع و تعد أربعين ، خمسين
دنيا ، عماله تلف شمال في يمين
واحنا زي أجدع مغمض مش شايفين !
صبح ، ضهر ، عصر ، ليل
و ترجع تاني من الاول كأنها طاحونة
بتطحن قمح ناشف ، جلده تخين
واحنا مستسلمين ، تايهين ، شاردين
طب و اللي خلق الخلق يا دنيا
معاكي لي سنين ، و ليكي عندي حنين
بس شوية ! شوية تاني و حعرف علي فين
فاكره لما كنتي طيبه كده و حنينه
طب فاكره لما كنتي مهذبه و قريبة
كان اليوم يعني يوم و الساعة ستين
والدقيقة دقيقة و لا احنا مش فاكرين ! ؟
طب شفتيني بالمريلة لما كنت لِسَّه قبل سن
ال " ين " يعني لما كنت عشره و حداشر
يااااااااه ! كل ده وقت عدي !؟
طب فاكره النادي و وقفة البيسين
مع أحلي شلة و البنات رايحين جايين
عاكسنا ؟ آه عاكسنا بس كنّا مؤدبين !
زعقنا ؟ بس كان الحس حس عاقلين
فرحنا ؟ آه والله فرحنا .. بس كنّا ابسط المبسوطين
فاكره اخويا و بالساعات رغي في حاجات
كتير وفي ليلة كامله نوم مافيش
و عشوة حلوة الساعة واحدة
طب بالله عليكي فاكره ثانوي و أحلي سنين ؟!
لما عرفنا فنجان قهوة و سهره مذاكرة
طب لِسَّه فاكره .. قعدة القهوة و ندهة القهوجي ؟
شاي علي فرسكا ؟
كبرنا و عدت سنين ... ياااااااه علي السنين
طيب شفتي أمي وهي واقفة مستنياني بلهفة تسمع نتيجتي و رايح علي فين ؟؟!!
معهد و لا كلية اربع سنين ؟!
دور رايع ، شقة عشرة ، حجاز ده شارع
الحنين ...!
طيب جيشي لما رحت اقدم وَيَا أبويا ؟
سألته ؟ هو الجيش وحش
قالي لأ ... دي بلدك اخدمها بعينيك الاتنين
وداري دموعه عني ... و قالي انت رجل
يللا يا ابني اركب اوتوبيسك وروح ادي واجبك
لأجل وطنك يبقي عالي فوق بيك و بالباقيين
راحت ليالي و جت ليالي
طب فاكره شله حلوه علي نيل كريم
صيف و شتا و حنين وَيَا حنين
دلوقتي ... العمر عدي و داس علي احلي سنين
مسبش غير ذكري حلوة نفتكرها وقت الرميم
اصل أجمل ما فيكي هو الحنين
لسنين طويلة عدت و انطوت
زي ما القطر بيطوى بلاد
عرفتي ليه بقولك " فاكره "
اصلي واضح اني انا بس اللي فاكر
وانتي دورك تطوى سنين ورآها سنين
طب فاكره عّم جمعة بقال شارعنا
ولا كبده في سندوتش
ولا طبق فول الصبح قبل طابور الصباح
مع فحل بصل و قرن شطة من عّم حسين
ولا الكازوزه و القصب
ولا شيكولاتة بيمبو
ولا كورونا
ولا الصابونه
والله شكلك انتي اللي اديتينا الصابونه
مش قادر ملعون أبوكي دنيا بنت ....
اصل انا اتربيت علي حاجه غير ابن و بنت تيت
شفتي حزني و شفتي فرحي
لعبتي بي يا بنت آدم
و كتبتي أطول مسرحية عليّ
وانا اتفرجت !!
كنت بلعب دور الضحية و بتفرح علي نفسي
شفتي طيبتي ؟؟! شفتي هبلي ؟!
شفتيش سذاجه ولا عباطة زي دي ؟
والله بكتب من خُلق ضاق
وحلم عوده لماضي جميل
حلم بات مستحيل
بس لِسَّه فيه أمل
مهما ان فرقتي بيننا
أو قسيتي علينا !!
صحاب سافروا غصب عنهم
لاجل اكل العيش مر
عرفتي ليه قلتلك " نفضل طوله نحارب " !؟
سيبك انتي ! ذكرياتي هي عمري
اللي انقضي و مش حيرجع تاني
واللي شفته بيحري مني و بجري وراه
زي اللي عايز يمسك فريسة
ذكرياتي هي دنيتي
ذكرياتي هي صحبتي
وأوعي تقوليلي ما انت اللي عايز كده !!
حقولك " لأ " يا حلوة
انتي اللي عايزة كده
ما انتي ايه فارق معاكي ؟
ولا حسه و لا أيدي طايلاكي
اه يا بنت ال .... الناس !
خليكي كده تدوري بينا
و تشقلبينا ، و تشيلي فينا و تحطي فينا
و علينا !!
انا ماشي و حوقف كتابة
اصلك مس حسيسة و كلك كآبة
انا راجع لقلمي و كراستي و كتابي
عايز ارجع صغير و انتي مالك ؟؟!
ايوه نفسي ابقي عيل تاني احبي
و أجري و العب تحت بيتنا
الف بالعجلة و انده علي صاحبي حمادة
و ميدو و فادي و خالد و عمرو و شريف
و احمد و وائل و هيثم
عايز ارجع علي تختتي في الفصل
عايز البس المريلة
عايز اكل موز في كيس
عايز أقف عند الكانتين
و انده عّم رمضان
اقوله اديني بيمبو و كزوزه
عايز اصحي ألاقي يومي شكلة
زي زمان ... وقت ما كان الزمان
زمن الزمان !!
عايز انزل انط في المترو دي زمان
عايز اخرج وَيَا صحابي
راجي و كريم و أمير و محمود و فادي
ايوه عايز اشوف ناس
راحوا مني
سابوني و سافروا بدري بدري
عشانك انتي
مشفتش جدي
يا شيخة ملعون ابو جد جدك !
طب حرجع تاني و تاني
وأصرح من بيتنا دور رابع شقة عشرة
وحقولك
انتي ولا حاجه
ولا حاجه
واحنا ولا فهمنا حاجه
اصلك اخدتي كل حاجه
حتي إحساسي ضاع معاكي
لما خليتيني وَيا أشعاري
لوحدي!
لما طلعتي و قلتي " محمول "
و نت و ابصر ايه !!
وديتي فين مشاعري و إحساسي ؟؟!
مش حقولك بنت كلب
عشان كده بعظم فيكي
مش حقولك غير ملعون ابو أبوكي
طيب أسألك ؟
فين صحابي ؟ فين جيراني ؟
فين أم شحاتة ؟
اخدتي ناس ، سفرتي ناس
مش حقولك حاجه تاني
واضح كلامي
مش لادد عليكي
يللا
انا حمشي و غيري حيمشي
و انتي قاعدة فاكره نفسك منورانا
غلطانة !!
يللا طيري
انا راجع بذكرياتي
وقت ما كنتي انتي أغلي حاجه في حياتي
سلام بقا
سايبك شوية ، بس راجعلك تاني
رايح أدور علي صحابي
وبإرادتك او غصب عنك
حلاقي ناس وحشوني
وانتي سفرتيهم و اخدتيهم من حياتي
Comments